काठमाडौं, कार्तिक २ । चीन पुगेका उपप्रधान तथा गृहमन्त्री एवम् माओवादी नेता नारायणकाजी श्रेष्ठलाई हृदयघात भएको छ । सामान्य खालको हृदयघात भएको र उनको छातीमा स्टेन राखिएको उनका स्वकीय सचिव सुरेशकाजी श्रेष्ठले जानकारी दिएका छन् ।
बेल्ट एण्ड रोड इनिसिएटीभ (बीआरआई) शिखर सम्मेलनमा भाग लिन गृहमन्त्री श्रेष्ठ सोमबार चीनको राजधानी बेइजिङ उडेका थिए । बुधबार मध्यराततिर छातीमा अचानक समस्या देखिएपछि उनलाई पेकिङ युनियन मेडिकल कलेजमा भर्ना गरिएको थियो ।
प्राप्त जानकारीअनुसार, गृहमन्त्री श्रेष्ठको स्वास्थ्यावस्था अहिले खतरामुक्त रहेको छ । तर चिकित्सकहरूले २४ घण्टासम्म अब्जर्भेशनमा राख्नुपर्ने बताएका छन् ।
